Browns Bay 的薯條和魚

24-11-07 Sat 陰

因為生菜園五天工作，所以今早又回到了士多啤梨園既懷抱。放工後我地決定出去玩吓，所以約左 Fai 去搵吓附近有冇馬騎。渣車到附近最有可能有馬騎既地方，結果都係撲空，唯有到附近既 Browns Bay 睇吓海灘。雖然呢到喺一個旅遊景點，但我覺得只係普通沙灘一個，啲沙又唔滑。我哋行行吓見到間小型雪糕點，為咗想補償一吓失望既心情，咁就夾錢買咗一杯雪糕，可惜雪糕只喺普通貨式。打算離開之際，發現有間賣 Fish and Chips 既舖頭，諗諗吓嚟到呢度咁耐都未試過，雖然不太肚餓，但都決定夾錢一試。我哋 order 咗一份魚，一份薯條，等咗一陣，店員比咗一包熱辣辣用紙包住既嘢我，仲要好鬼大包。我地好興奮咁將佢打開，原來薯條和魚係咁大份既！但發覺原來係無茄汁送的！經商量後都係夾錢買一盒茄汁，先試薯條，確實皮脆肉軟，口感不俗，但當我點完茄汁後即刻想將薯條吐返出嚟。初時我以為包茄汁變壞咗，但後來先知道呢隻味係紐西蘭口味，為左要沖淡個口嗰陣怪怪既味道，我就轉移食魚。（呢件喺我喺紐西蘭第一次食既海鮮）魚肉炸得烚到好處，不過鮮味唔夠，不過經已算好好味。我哋正在忙碌食嘢既時候，發現有幾隻海鷗飛到我哋附近，好似好想食魚與薯條咁，我順手將一條炸燶咗既薯條碎掉出去，佢地即刻去搶食薯條，我覺得好神奇，點解海鷗係會食薯條，掉完一粒之後，發覺愈來愈多海鷗飛去我地旁邊等食，佢地仲傻更更，只要你扮掉薯條佢地就會沖去搵（哈哈！我仲拍左一段示範片段比大家睇）。食完薯條玩完海鷗，我哋就返去屋企。