19-11-07 Mon 晴
終於到左第一天要工作既日子，真係返診所都無咁早吵，我同Wing天都未光零晨4:30就起身，食埋個白麵包早餐準時5:30坐agent架車往草莓園出發 (唔好以為唔駛錢，每程位位$2) ，大約20 mins.到達草莓園。著住對fashion gum boots落場超唔習慣，踏上去個泥地有d企唔穩，每人分佈好個號碼牌後就要自己選一架”戰車” (得1個轆，用來載住d放滿左摘好既士多啤梨籃，1個籃有9個小盒，1個小盒就好似大半個家庭裝雪糕盒咁)，然後推返出去條line既頭/ 尾/ 收集車上等人收集)，然後一個人一條line排好 (感覺有d似跑馬)，載住1至3個吉籃 (如你不怕重大可以拿4個，我就頂盡勉強都係拿3個)，一路推一路彎腰摘。每人負責左右的草莓樹，有人教完我地摘既方法後就各自開始 (呢個果園規矩係摘既時候唔准掂到粒草莓，草莓要留條棍而且不可長過6mm！) 。我地既人工係contract制，$0.5/ kg之後仲要交稅 (即大約剩返$0.3x/ kg 落袋)。因為夜晚好凍，d草莓都凍到硬晒，好似係冰格拿出黎咁 (唔好講笑..我成個人都好鬼凍！)。摘摘吓唔小小搣爛左粒好大粒草莓既葉，覺得超可惜！諗左一陣 (因為怕唔乾淨)，最後都決定將它送到我的肚裡..hee，那就是我的第一粒超新鮮超甜的士多啤梨了！) 第一個場既草莓都幾大粒，好快就滿一籃，滿左就知道大獲了，架車本身就已經重又難推，載滿士多啤梨更加唔係好推得動架車，決定先將滿左既籃拿返去條line既頭放低…超重呢..我諗最少有8kgs！我同Wing摘得超慢，摘一行都成一個鐘，不斷係咁彎腰起身又要搬d籃，腰都斷！太陽開始出黎，我地要在最熱既時間前完成。越來越曬，越摘就越慢…仲有呢度d人唔飲水 (應該係想飲冇力飲)，因為飲水後可能要去廁所，廁所離塊田好遠，如果你咁啱摘酊條line既中段仲大獲，去又累又浪費時間。一日大約平均做3個場，通常要摘完先走得，你唔摘其他人都要幫你完成埋先可收工，今日就由朝早6:00摘到下午1:00。返到家後沖完涼食完公仔麵已經半死狀態，手痛腳痛腰斷，基本上坐都有困難！我和Wing都要互搽”卉肌”，之後Wing話佢唔眼瞓但我都係頂唔順要瞓返幾個鐘休養返下…
瞓醒後已經趕唔切去library，咁就唯有食晚飯之後又去瞓覺了。
