22-11-07 Thu 陰
昨天晚上個 agent 突然走嚟同我哋講問我哋可唔可以幫佢去生菜園做兩日工，時薪 NZ$ 11.5，不過要我哋保守秘密。因為只喺得兩個位，所以唔可以比咁多人知。因為摘士多啤梨實在幾辛苦，我同 Wing 即刻 lur 飯應。今早我哋懷著重獲新生既心情返新工，我哋喺一個溫室生菜園工作，打卡後就立即帶上手套，到旁邊既溫室幫手包裝生菜（佢地好似喺到趕緊出口一批最靚最新鮮既生菜），我哋既工作就係將生菜一手拎起，拔走啲根，然後攞走個小盆子，再攞刀仔切咗啲泥兼除去所有黃黃哋既葉，跟住入盒。（唔好睇落咁簡單，其實啲生菜個頭好鬼硬，而且嗰啲所謂既黃黃地既葉，以我既定義嚟講只喺無咁綠，對於三餐不飽既我哋嚟講，簡值喺浪費！）我哋開行 Turbo 都慢人地成條街，佢地好快就趕完工。之後我地比人叫咗去休息十分鐘，再去另一個溫室包賣往本地既生菜（心諗呢份工咁筍既）。今次有啲唔同，唔駛用刀仔，只係將生菜拎起，拔走啲根，然後攞走小盆子，搣晒所有黃黃哋既葉再一手將生菜放入膠袋並用橡筋紮好，放入大籃，一個大籃放十二個生菜（做野時生菜園老闆仲不時入嚟問我地辛唔辛苦，做得慣唔慣開唔開心）。種生菜既枱大約去到腰咁高，要拎佢地其實都唔係咁就手，而且唔可以拎晒出嚟再入袋，要包完一個到一個（咁做係要保持新鮮喎），簡直係超無效率。咁我同呀 Wing 就諗，不如一個人一搣一個人包，我哋明明眼見佢哋都係咁做，但係我哋咁做既時候佢哋又話唔得，咁我哋唯有繼續用呢個超無效率既方法，包到收工。雖然份工做上嚟無咩效率，不過我同呀 Wing 都覺得呢到好似好溫暖，相對摘士多啤梨呢份簡直係筍工，就咁我地就帶住滿懷希望既心情放工返屋企。
